nyandung

Aya ronda jadi pahlawan
asal ti Desa Nyalindung
Bade randa komo parawan
asalkeun kersa dicandung

Kembang culan kembang tanjung
angkrek mah na tatangkalan
Rek sabulan dek sataun
moal weleh diakalan…

 

Bale-bale jero imah
di imah ngelapan bedil
Sok bae ari nyandung mah
poma hilap kudu adil

 Awi tali awi bitung
awi haur keur ayakan
Kaciri urang Cipicung
leumpangna rarampayakan

 

Raong hayam kongkorongok

Ciciren wanci rek ganti

Geus lami hayang ngalongok

Sien lali kana jangji

 

Kembang eros jeng jalaprang

Cantigi rejeng malati

Sanaos langka patepang

Pamugi ulah rek lali

 

 

Hayang iuh make payung

Kumaha mukakeun nana

Hayang wawuh jeng nu pundung

Kumaha nyukakeun nana

 

Melak humut dina catang

Mereun hurang jeng solasih

Sok emut jaman katukang

Waktos urang silih asih

 

 

Ngala permut dina jurang

Karabut dapuran nana

Lamun emut abi hudang

 Emut kasaurannana

 

 

Dadap cangkring dina gawir

Ngajajar pa,antay-antay

Paingan teungenah pikir

Gara-gara rek paturay

 

 

Cihcir ngait tengah peting

Ciang-ciang lir midangan

Pikir ngait berang peting

Kahayang acan kasorang

 

Cikaracak ninggang palupuh
palupuh ninggang bakatul
Ku nalaktak eta sepuh
puguh nyandung matak ripuh!!

 

 

 


%d blogger menyukai ini: